VERHOUDINGS, TROU, SKEI, HERTROU

VERHOUDINGS, TROU, SKEI en SEKS.

Hierdie is een van die heel belangrikste sake en probleme in ons harte en samelewing.

Verhoudings, buitehuwelikse seks, ontrouheid, owerspel, egskeidings, geweldige pyn aan kinders en families en seksuele siektes is geweldig algemeen in die samelewing en selfs in die kerk vandag. Daar is dus baie groot fout. Ons Vader en Skepper het egter ‘n duidelike weg en antwoord. Meeste mense vat dit ongelukkig nie, daarom al die pyn en ellende. Maar elkeen wat dit aanneem, sal baie gespaar word - soos met alle ander aspekte van die lewe as ons God se wil bo ons eie of ons tradisies stel.

Ons MOET soek en uitvind wat die Bybel ons leer en nie net volg wat tradisie of mense ons geleer het nie. Tradisie maak die woord van God kragteloos en is meestal verkeerd.

DIE BELANGRIKSTE:

God is ons Vader en Skepper. Hy is reg, regverdig, rein en heilig en het nog nooit gelieg of ‘n fout gemaak nie. Hy het ons geweldig lief en al sy woorde is goed en reg vir ons en is bedoel om ons te seën Jer. 29:11. As ons ons nie daaraan steur nie en dit verwerp en eerder na die slang, leuenaar, dief en moordenaar luister, veroorsaak dit geweldige jaloesie, pyn, wonde en smart in ons Vader se hart. Dit verbrysel Hom Eseg.6:9. Dit bedroef Sy Gees. Dit blus sy Gees uit. Jesus het hierdie sondes in sy liggaam aan die kruis gedra om ons te toon hoe pynlik sonde vir hom is en hoe dit Hom deurboor en martel. Dit het Hom vermoor. Daaom MOET ons ons elkeen bekeer en met sonde stop en Hom gehoorsaam wees en reg doen. 1Pet. 2:24. Dan belowe Hy dat Hy ons sal vergewe en reining.

Die een wat aangaan om Hom ongehoorsaam te wees en om Hom so te wond en te martel met sy sonde, sal vir ewig in die hel brand en betaal vir elke druppel van Sy bloed en vir elke wond wat sy sonde gemaak het. Ongelukkig is byna die hele mensdom in hierdie groep. As jy nie een van die wil wees nie, luister, ondersoek en doen wat hieronder staan. Dit is harde woorde, maar die waarheid. Moet dit nie summier verwerp nie.

1. VERKEERDE LERING.

Jy sal uit wat volg duidelik sien dat ons baie verkeerd geleer is deur meeste kerke, ons tradisies en  deur die samelewing. Ons is selfs geleer en toegelaat direk TEEN wat God beveel het. Dit is as gevolg hiervan dat daar soveel probleme en siektes in die mensdom is. God is heilig en reg. Doen eerder Sy wil volkome. Dit is baie makliker as ongehoorsaamheid en omgekeerd. Jy sal dit self ondervind.

2. KYK EN BEGEER

God het deur Jesus Christus gesê: “Maar ek sê vir julle dat elkeen wat na ‘n vrou kyk om haar te begeer, reeds in sy hart met haar egbreuk gepleeg het. As jou oog jou dan laat struikel, ruk dit uit en gooi dit weg van jou af; want dit is vir jou beter dat een van jou lede vergaan en nie jou hele liggaam in die hel gewerp word nie.” Matt. 5:28-29. Ons MAG NIE eers na ‘n vrou KYK EN BEGEER nie. Nog minder “date,” vat, soen en vry nie. God verbied dit. Ons moet liewer die oog uitpluk wat dit doen.

Moet nie vir God sê dat dit onmoontlik is nie. Onthou HY weet alles en Hy is reg. Hy weet wat goed is vir jou. Jy moet doen wat HY sê. Dit is moeilik en vir die mens uit sy eie onmoontlik, maar God kan jou hart en gedagtes so wonderlik reinig en verander, dat jy kan doen wat Hy sê. Vra liewer vergifnis en verlossing van jou sondes en dat hy jou so verlos en reinig dat jy nie meer kyk en begeer en sondig nie.

Paulus sê dit is goed vir ‘n man om ‘n vrou nie aan te raak nie. 1Kor. 7:1. Jy mag nie eers met jou oog aan haar vat en begeer nie. Dus nog minder mag jy met jou hand aan haar vat en begeer nie. Verwerp dit en jy verwerp die hemel want egbrekers gaan nie die hemel ingaan nie. 

Sien jy hoe verkeerd ons geleer is? Moet nie na die mense en tradisies luister en Jesus verwerp nie. Glo en gehoorsaam Jesus eerder. Hy het nét waarheid gepraat en nét Hy praat die waarheid.

Onthou dat die hart baie bedrieglik en verleibaar is. Moet nie jou hart glo of vertrou nie. Spr. 4:23, Jer.17:9. Gehoorsaam God en Jesus. Hy sal jou reg lei.

Liefde (verlief wees) vir die ander geslag en fisiese verhoudings soos paartjies buite die huwelik is WELLUS, sensueel, seksueel  = LUST = passionate lust 1Thess. 4:5 = cravings of sinful man 1Joh.2:16.

Jongmense moet VLUG van hierdie begeertes. 2Tim.2:22. Hulle moet die ou mens aflê wat ten gronde gaan deur die begeerlikede van die verleiding (deceitful lusts) Efes.4:22-24. Ons moet hoerery, onreinheid, hartstog, slegte begeertes, ens. doodmaak Kol.3:5. Ons mag geen voorsorg maak vir die vlees om sy begeerlikhede te bevredig nie Rom.13:14. As ons Jesus liefhet, sal ons Hom gehoorsaam Joh14:15. As ons Hom ongehoorsaam is, het ons Hom nie lief nie. Dus haat ons Hom en as ons iemand haat, maak ons hom dood. Ongehoorsaamheid vermoor Jesus.

Moet nie na enigiets kyk wat jou begeerlikhede opwakker nie, bv. tydskrifte, TV, Videos, films ens. nie. As jy dit toelaat, is jy op ‘n pad wat jou gaan besoedel en verongeluk.

Beklee jouself BEHOORLIK met beskeidenheid en ingetoënheid sonder allerhande haarvlegtery, goud en kosbare klere nie, maar met “godliness” (1Pet.3:3, 1Tim.2:9) sodat jy nie ‘n struikelblok vir jouself en vir die ander geslag is nie. As jy so aantrek dat die ander na jou moet kyk en jou begeer, het jy klaar gestruikel in jou hart en gedagtes en jy laat die ander struikel. Jesus sê dit is dan beter dat jy met ‘n klip om jou nek in die see gegooi word en versuip. As jy verleidelik aantrek, sal jy vleeslike en sondige mense aanlok. Hulle sal jou net smart aandoen. Luister wat God sê. Hy weet baie beter as jy. 

Onthou ‘n persoon wat jou begeertes aantrek en verlok, is uit die wêreld en nie uit God nie 1Joh.2:15-16.

Slegs God gee ons ware liefde (agapé) deur gehoorsaamheid aan Hom. Dit is die vrug van Sy Gees in ons harte. Dit is selfopofferende liefde t.w.v. God en die ander een. Ons sal liewer ly as om teen God of ‘n ander mens te sondig. As ons dit nie het nie, het ons ‘n duiwelse gees.

Die vrug van die vlees is owerspel, hoerery, onreinheid, ongebondenheid, ens. Die wat dit doen sal die koninkryk van God nie beërwe nie Gal. 5:19-21.

Ware liefde is lankmoedig, soek nie sy eie belang nie, is nie trots en opgeblase nie, handel nie onwelvoeglik nie, is nie bly saam met die ongeregtigheid nie en doen nie ongeregtigheid nie. 1Kor.13. Ware liefde sal doen wat reg is soos God sê.

Behandel jonger meisies soos susters in “ALLE REINHEID (absolute purity)” 1Tim.5:2.

As jy as jongmens te skaam is om te lewe soos die Bybel leer, sal Jesus Hom vir jou skaam in die oordeelsdag Mark.8:38.

As jy as kind wil hê dit moet goed met jou gaan, moet jy jou ouers eer in die Here (Efes.6:1-3) – ook hierin. Hulle is deur God daargestel oor jou en vir jou beswil. Hulle sien en weet meestal as jy verkeerd gaan. As jy dit verwerp, vra jy vir ‘n slegte en ongelukkige lewe.

As jy as ouer wil hê dat dit goed moet gaan met jou kind, sorg dat hy jou eer in die Here. As jy hom toelaat om jou nie te eer nie, laat jy toe dat ‘n slegte lewe oor hom kom.

As ons gewetes skuldig is en ons pla, moet ons weet dat God meer weet en ons oordeel is erger. 1Joh. 3:20.

Kyk na Isak en Jakob se voorbeeld.  Lees die boek “I Kissed Dating Goodbye”  en “Boy meats Girl” van Joshua Harris. Dit sal alles nog duideliker maak.

Onthou weer, God, ons Vader bedoel alles so goed en in volkome liefde vir jou. As jy dit verwerp, deurboor en verbrysel jy sy hart en jy kruisig Jesus weer. Jou skuld is dus veel erger as net jou sonde.

3. SY VROU AANKLEEF

 “Daarom sal die man sy vader en moeder verlaat en sy vrou aankleef. En hulle sal een vlees wees.” Gen.2:24. Matt. 19:5. L.W. ‘n Man mag net SY VROU aankleef. ‘n Man mag nie eers na ‘n vrou / meisie KYK en begeer nie, en dus geensins een aankleef voor die huwelik of met haar seks hê nie – tensy hulle getroud is nie. As jy dit verwerp, sal jy jou eie lewe met baie smart en elende belaai.

4. EEN VLEES WORD

“Daarom sal die man sy vader en moeder verlaat en sy vrou aankleef. En hulle sal een vlees wees” Gen. 2:24.

“Om hierdie rede sal die man sy vader en moeder verlaat en sy vrou aankleef, en hulle twee sal een vlees wees; sodat hulle nie meer twee is nie, maar een vlees? Wat God dan saamgevoeg het, mag geen mens skei nie.” Matt.19. Hulle word voor God EEN VLEES as hulle gemeenskap het. L.W. Hy mag net SY VROU aankleef en een vlees met haar word.

 “Of weet julle nie dat hy wat ‘n hoer aanhang, met haar een liggaam is nie? Want die twee, sê Hy, sal een vlees wees.” 1Kor.6:16. Selfs met ‘n hoer word die twee een vlees, of hulle getroud is of nie.

God sê dat twee EEN VLEES WORD met seks.  Twee mense ruil hulle liggame uit en neem en gee hulle diepste en intiemste. Hulle word waarlik versmelt in liggaam en siel. As hulle dit gedoen het, sê God, is hulle EEN VLEES en GEEN MENS mag hulle nou weer skei nie. God verklaar hulle dus PERMANENT EEN VLEES. Hulle moet dan lewenslank aan mekaar getrou wees. As hulle nie trou nie of skei, mag hulle nie weer trou solank die ander een nog lewe nie.  Matt. 19. Rom 7:2-3.

Hulle kan nie en mag ook nie weer een vlees word met ‘n ander een nie. Iemand mag dus ook nie trou met een wat EEN VLEES met iemand anders was nie.  As hulle dit doen is dit egbreuk en hoerery.

As twee wat een vlees geword het tog skei, verskeur hulle hulself middeldeur en dit gaan altyd gepaard met geweldige geweld, konflik, smart, pyn, lyding, wonde, ellende, verlange, eensaamheid, littekens, skuldgevoelens, ens. en vir lewenslank. Daarom het God gesê dat GEEN MENS hulle MAG SKEI NIE. Slegs i.g.v. hoerery, mag hulle skei want dan het die ontrou een sy maat alreeds verskeur en afgeskeur om een vlees met ‘n ander een te word. Dit is gruwelike sonde voor God.

Hierdie is uiters krities, ernstig en belangrik. Weens ongehoorsaamheid hieraan gaan dit in die wêreld soos dit gaan. Enigeen wat God liefhet, sal Hom hierin gehoorsaam wees. Verwerp dit en jy verdoem jouself. Daar is vergifnis as ons gesondig het, maar ons kan dan nie daarna die woord van God gaan breek nie.

Met verkragting is ‘n meisie onskuldig as sy in die stad geskreeu het. Deut. 22.

5. TROU REG:

In die lig van bg. is dit absoluut belangrik om reg te lewe en reg te trou. As jy bg. onthou en daarby hou, sal dit wees omdat jy God as jou God, Vader en Koning aanvaar het en Hom daarom in alles wil gehoorsaam. Dan sal Hy jou ook lei om in reinheid te trou volgens Sy wil. Adam het nie vrou gesoek nie. Hy het geslaap en God het Eva na Hom gebring.

As jy Hom egter hierin verwerp, sal jy mislei word en probleme optel so ver soos jy gaan.

Trou was so ‘n ernstige saak dat die dissipels gesê het dat dit beter is om nie te trou nie, en Jesus het dit toegegee want nie almal kan of wil Sy standaard vat nie. As ons nie God se woorde hieroor vat nie, sal ons in sonde trou en sal dit sleg met ons gaan. Dan sou dit beter gewees het om nie te trou nie. Matt. 19.

God het deur Moses beveel: ‘n Meisie moet as ‘n maagd trou. As sy nie ‘n maagd is by troue nie, is sy gestenig.  As ‘n getroude buite die huwelik gemeenskap het, moet altwee sterwe. As ‘n verloofde meisie gemeenskap het, moet altwee sterwe. As sy verkrag is, moet die man sterwe. Deut.22:13-30. Een wat Moses se wet ongehoorsaam was, moes so sterf, maar die een wat Jesus ongehoorsaam is, sal veel swaarder gestraf word. Hebr. 10:28-31; 12:25.

Ons het NET EEN geleentheid om te trou en dan is dit vir lewenslank want GEEN MENS MAG twee mense wat een vlees geword het ooit skei nie. Matt.19:6. So, ons MOET God se wil soek en vind en reg trou. 

“Laat die huwelik in alle opsigte eerbaar wees en die bed onbesmet; want God sal hoereerders en egbreekers oordeel” Hebr. 13:4.

Ons mag net “in die Here trou” 1Kor.7:39. 2Kor. 6:14. Buite sy wil is alles wat ons doen onrein.

God en Jesus is ons bruidegom. Ons is Sy bruid. God is ons Man. Jer. 31:32 KJV, Jer. 16:32. Ons mag nie dat iemand anders tussen ons kom en maak dat ons Hom ontrou en ongehoorsaam word nie. God is ‘n jaloerse God en verterende vuur.

God het vir ons ‘n man of vrou in gedagte – na Sy wil. As ons volgens ons vlees lewe en ‘n ander  een aanhang en trou as wat God wil, sondig ons. Ons mag net “in die Here trou.” 1Kor. 7:39. 

Paulus het ‘n goddelike jaloersheid oor ons om ons aan een man te verbind en ons as ‘n reine maagd aan Christus voor te stel 2Kor.12:2-3. Ons moet soos ‘n reine maagd teenoor Jesus wees en so trou.

6. EGSKEIDING:

In die lig van bg. is dit reeds duidelik dat ons NOOIT mag skei nie behalwe omrede van hoerery.

“Want EK HAAT EGSKEIDING.” Mal.2:15.  Ons MAG NIE doen wat God haat nie. Weens egskeiding word die huise en land met geweld vervul. Egskeiding is geweldadig pynlik op almal betrokke en is geweldadig op die kinders Mal. 2:15-16.

“Maar ek sê vir julle dat elkeen wat van sy vrou skei, behalwe omrede van hoerery, maak dat sy egbreuk pleeg, en elkeen wat die geskeie vrou trou, pleeg egbreuk.” Matt: 5:32. “En Hy antwoord hulle en sê: Het julle nie gelees dat Hy wat hulle gemaak het, hulle van die begin af man en vrou gemaak het nie, en gesê het: Om hierdie rede sal die man sy vader en moeder verlaat en sy vrou aankleef, en hulle twee sal een vlees wees; sodat hulle nie meer twee is nie, maar een vlees? Wat God dan saamgevoeg het, mag geen mens skei nie. …. Hy antwoord hulle: Omdat Moses weens die hardheid van jul harte julle toegelaat het om van julle vroue te skei; maar van die begin af was dit nie so nie. Maar Ek sê vir julle, elkeen wat van sy vrou skei, behalwe oor hoerery, en ‘n ander een trou, pleeg egbreuk; en die wat die geskeie vrou trou, pleeg egbreuk. Matt.19:4-9.

Om te skei is egbreuk. GEEN MENS MAG getroudes SKEI nie. Die mense, magistrate en regters wat dit doen, oortree teen God en is skuldig en veroordeel.

Iemand wat skei, pleeg egbreuk / owerspel en geen egbreeker sal in die hemel ingaan nie. Lev.20:10; 1Kor.6:9; Hebr. 13:4; Open.2:22.

As ‘n ongelowige in ‘n huwelik wil skei, dan kan die gelowige die ander een laat skei t.w.v. vrede, maar dan mag hulle nie weer trou nie. 1Kor. 7:10-15. Die wat weer trou pleeg egbreuk.

7. ONTROUHEID / OWERSPEL EN HOERERY:

Slegs i.g.v. ontrouheid mag hulle skei. Sien bo.

‘n Vrou wat in die OT beskuldig is van ontrouheid aan haar man, is ou ontbinde altaar bloed gegee om te drink. As sy skuldig was, moes dit haar vergiftig en doodmaak. As sy onskuldig was, moes dit haar reinig en swanger laat word. Num5:11-31. Een wat Moses se wet ongehoorsaam was, moes so sterf, maar die een wat Jesus ongehoorsaam is, sal veel swaarder gestraf word. Hebr. 10:28-31;12:25

Vir die vrou by die put het Jesus gesê: “Jy het reg gesê: Ek het nie ‘n man nie; want jy het vyf mans gehad; en die een wat jy nou het, is nie jou man nie. Dit het jy met waarheid gesê.” Joh.4:17-18. Wat sou sy moes doen as sy haar hier bekeer het? Dis nie haar man met wie sy nou bly nie. So, dit mag nie aangaan nie. Sy het 5 mans gehad. Na wie moet sy teruggaan? Na nie een nie, sy sou alleen moes bly en ophou sonde doen.

Vir die vrou in owerspel betrap in Johannes 8 het Jesus gesê: “Ek veroordeel jou ook nie. Gaan heen en sondig nie meer nie.” Joh. 8:11. As Jesus haar nie veroordeel het nie, beteken dit sy het alreeds haar sonde bely en haar daarvan bekeer. As sy getroud was, moes sy teruggaan na haar man (as hy haar sal terugneem na so ‘n daad) en sy moet ophou met owerspel. As sy ongetroud was, sou sy moes ophou om met getroude mans owerspel te pleeg. As sy egter sou aangaan met haar sonde, sou sy veroordeel wees volgens die Skrif.

8. SKEI EN WEER TROU:

Die ongehoorsames luister nie na God nie, maar ons verkondig nietemin wat God beveel – ter getruienis van God en dat die gehoorsames gehelp kan word. As een hom egter in enige stadium bekeer, moet hy van dan af God se wil ernstig soek en doen volgens wat die Skrif sê. Hy mag nie nou doen wat Skrif die onbekeerde verbied nie.

“En aan die getroudes beveel ek – nie ek  nie maar die Here – dat die vrou nie van die man moet skei nie; en as sy tog van hom skei, moet sy ongetroud bly, of haar met haar man versoen; en dat die man sy vrou nie moet verstoot nie.” 1Kor. 7:10-11.

Mar_6:17-18  Want Herodes self het gestuur en Johannes gevange geneem en hom in die gevangenis geboei, vanweë Heródias, die vrou van Filippus, sy broer, omdat hy met haar getrou het. Want Johannes het aan Herodes gesê: Dit is u nie geoorloof om u broer se vrou te hê nie. Matt. 14:3; Luk 3:19.

Dit is hieruit en uit die voorafgaande duidelik dat geskeides geensins weer mag trou nie,  en dat iemand ook nie met ‘n geskeide mag trou nie, behalwe as die ander een gesterwe het. Matt 5:31-32, 19-1-12. Rom. 7:2-3. Wee die pastore en predikante wat dit doen en mense laat dink dit is vir God aanvaarbaar. Hulle is medepligtig en aandadig aan egbreuk en aan oortreding teen God. Hulle gee goedkeuring aan die wat God se gebod breek en is veroordeel. 

9. DIE ROL VAN BEKERING EN VERGIFNIS.

Johannes die Doper het vir Herodus gesê dat dit hom nie geoorloof is om sy broer se vrou te neem nie. As die wet vir ‘n onbekeerde geld, geld dit sekerlik meer vir iemand wat nou tot bekering gekom het en God se wil volkome wil doen. Verander bekering en vergifnis enigiets hieraan? Nee, gladnie. Die wet bly.  Jesus het nie gekom om die wet te ontbind sodat ons dit nou maar mag breek nie. Gladnie en inteendeel. 

As iemand seks gehad het en dan tot bekering kom  en sy sondes word vergewe, mag hy dán ‘n ander vrou neem? NEE, gladnie. Waarom sal sy bekering hom nou magtig om nou te doen wat die onbekeerde nie mag doen nie? Hy bekeer hom mos juis om nou God se wil te doen. Verder het hy een vlees geword met ‘n ander een. ‘n Mens kan net een keer een vlees word. Daarna is alle seks met ‘n ander egbreuk en hoerery behalwe as die lewensmaat gesterf het.

10. SAMEVATTING:

Volgens die Woord van God het ons net EEN kans in ons lewe om met net EEN persoon EEN VLEES te word. Dit mag net in die huwelik wees. Selfs al trou hulle nie, het hulle een vlees geword. GEEN MENS mag dan skei wat God so saamgevoeg het nie, behalwe oor  hoerery van die ander een. Hulle mag nie met ‘n ander een weer trou en weer een vlees word nie. 

Die dissipels het die erns besef en gesê dat dit dan beter is om nie te trou nie. Toe sê Jesus: “Almal vat hierdie woord nie, maar net die aan wie dit gegee is. Want …….. en daar is persone wat hulleself onbekwaam gemaak het ter wille van die koninkryk van die hemele. Wie dit kan vat, laat hom dit vat.” Matt.19:11-12. Meeste verwerp wat Jesus sê. Maar as jy bereid is om Hom te gehoorsaam, so swaar as wat dit mag wees, vat dit, dit is tot jou beswil. Waar aangedui, maak jouself onbekwaam om te trou t.w.v. die wil van jou Vader.

Dis dalk swaar, maar as jy jou kruis opneem en Hom volg, is jy Sy dissipel. As jy jou lewe t.w.v. Sy woord neerlê, sal jy ware lewe vind. Omgekeerd is ook waar. Baie moes al tussen lewe en dood kies t.w.v. Jesus. Ons staan elkeen voor daardie keuse in verkillende vorme. Kies Jesus se wil bo jou eie lewe en begeertes. Hy kan baie beter vir jou doen as wat jy ooit met jou beste planne en verstand vir jouself kan doen.

Dit is ook duidelik dat bg. VIGS en seksuele siektes heeltemal sal voorkom. Mense wat dit aanvaar en daarvolgens lewe, het die heel beste geleeentheid om in reinheid te trou en lewenslank gelukkig getroud te bly en om dieselfde vir hulle kinders te leer en te bied.

Ons almal het gesondig. Die een in bg. die ander in ander opsigte. Jesus is gewond en vermoor deur ons sondes. As ons egter ons skuld aan die pyn, bloed en wonde van Jesus en ons naaste erken en bely en ware berou het en restitusie doen, kan ons genadiglik vergewe word. Jesus kan ons dan ook deur sy bloed reinig van alle sonde sodat ons sonde kan stop dat ons nou reg en regverdig kan leef.  Hy kan ons van struikeling bewaar dat ons daagliks sonder gebrek, vlek of rimpel voor Hom kan leef en dat ons eendag op die oordeelsdag so voor Hom met gejuig kan staan. Halleluja. Amen (=Laat dit so wees). 1Pet. 2:24, Matt.5:24, 1Joh.1:7-9, Jud:24, Efes.5:27.

Vir die wat aangaan om op Sy bloed wat hulle sou reinig, te trap deur sonde, wag die ewige oordeel en vuur. Amen. (So sal dit wees).

Mag die reddende genade van God aan almal verskyn.

U broer in Christus

Faan Oosthuizen. sdoosthuizen@xsinet.co.za